به گزارش هزارماسوله ،چی بارەو جە پایگاو هەوال کیانوCNNی پیجۆرە ئامەن:کەیخا و گەورەو هۆزو"TKemlups te Secwepem c"ی،ئینەشە دوپێک کەردەن و واتەنش:ئی گۆڕستانە بە کومەکو ڕادارێ کەوتەن بەرۆ.
ئی ئاموزشگای وەختو وێشەنە یۆ جە گەورەتەرین ئاموزشگای وەڵاتو کانادای بیەن کە جە کۆتایی سەدەو 19ی یانی تا ساڵەو 1970ی عیسایی و جە لاو کلیساو کاتولیکی فەعالیەتێش بیەن کە چی ماوەنە و ساڵەو 1960ی دریان بە دەوڵەتو فیدراڵی کە ئننەشە نەخاینا و ساڵەو 1970ی جە کار و هەرمانێ کەوت و هۆرپێچیا و بەرەشان بینا و ئیسەتێ بیەن بە موزە و بنکەو هەرمانێ کۆمەڵگای.
جاستین ترودۆ سەروەزیرو کانادای واتش: بەڕاسی ئینە دەردەی گرانە و موسیبەتێ گەورەن. چاعانەنە سیاسەتی کاری ئی مەدرەسە و فرەو ئا مەدرەسانە،گێرتەی و جەزبو زاوڕوڵێ بومی و ئەسیلو کانادای بە مەبەستو دورکەردەیشان جە یانە و فەرهەنگ و باوان و قەدەخەو قسەکەردەی بە زوانی ئەدایی بیەن و ناسەنشان هیچ زاوڕۆیە ویرو ویەردەی تاریخی و شناسی و هویەتی وێش بکەرۆ و تا ئا یاگێ تاوانشان فیرو جورێ فەرهەنگی تایبەشان کەردێنێ و پیجۆرە ئایین و فەرهەنگو بنەڕەتی و ئەسیلو مەردمو بومی ئی وەڵاتیشانە تێک دان و جەبەینشان بەردەن وجە گوزارشتو ساڵەو 2017وکومیسیونو"حەقیقەت و ئاشتی"کانادایچ ئی بابەتە ئامەن و سەلمیان و نویسیان کە بنبڕکەردەی و تاونای زوانی ئەدایی و ئاسیمیلەی،جە ڕیشەیی تەرین هەرمانێ ئاموزشی و فێرگەیی ئی مەدرەسانە بیەن.
تا ئیسەتێ زانیاری و هاگایی فرەتەر جە بارەو هۆکار و چەنی بیەی مەرگو دڵتەزین و سەختو ئی زاوڕوڵانە نەکەوتەن بەرۆ و پزشک قانونی کانادای خەریکو بەڕەسی و تاوتوکاری فرەتەریەن. چنها ساڵێ چیوەڵیچ گوزارشتێ جەبارەو ئازار و ئەزیەتی سکسی و ڕۆحی و تاخایەتێ مەرگو زاوڕۆڵان چی فێرگانە پەخش و وڵاو بیەبێ. ئی مەدرەسێ چیرو چەمداری و فەرمانو کلیساو کاتولیکو کانادای بیەنێ.