به گزارش هزارماسوله ، ئی تاوتوکاری زانشتیە سەرو مەیمونی تاقی کریانۆ و بیەی ئی مولوکولیە بی سەبەبو ئانەی تا ویروسو کرونای جە زیاذبیەی بگنانێ و پیجۆرە بی بە دڵوەشیوە پەی دەرمانی قەتعی ناوەشی کورۆنای.
ئی تاقیکاری زانشتیە کە جە مەجەلەو مولیکولێز(Molecules)چاپ و وڵاو بیەن،نیشانە مەدۆ کە مولکولو دلێو ژەحرو جۆری جە ماری ئەفعی(جاراراکاسو) مەتاوۆ ویروسێو کرونای دەرونو سلولێو مەیمونێ تا ۷۵% بەزنۆ و مەهارشا بکەرۆ.
"ڕافائێل گویدۆ"ئوستادو زانشتگاو سائوپائولو برزیلی بە هواڵ کیانو ڕویتێرزی واتش:ژەحرو ئی ماریە مەتاوۆ ئا پروتویینە کە نا دلێ ویروسو کروناینە،جە بەینش بەرۆ. ئی مولکولە "پپتەید"(Peptide)یا زەنجیرێ جە ئەسێدئامینێن(amino acid)کە مەتاوۆ بێ ئانەێ زیانێ بیاونۆ سلولانێ تەری،وێش بلکنۆ ئانزیمو ویروسو کرۆنای.
کارو ئی ئانزیمە کوپی و زیادکەردەی ویروسیەن و کاریگەری خاسش هەن جە فرەبیەی ئی ویروسیە. ئی ئوستادو زانشتگایە ئینەیچشە وات کە چاوەڵیچ ئی"پپتەیدئانتی(پاد)باکتریاییە" هەربیەن و مەکریۆ تاقیگایچەنە"سەنتێز" بکریۆ و ئینە یانی نیازێ بە بیەی و پەروەرش و ژیونای و نگاداری ماری نیەن و پیجۆرە هەرمانەکێ ئاسانتەر مەلۆڕاوە و هەرچن کارشناسێ بەروبومو ژیوای وەحشی(تایبە خزندەشناسێ) نیگەرانێنێ کە وڵاوبیەی ئی هەواڵیە بۆ هۆکارو ئانەی تا بڕێ ڕاوکەرێ جەنگەڵی بگنان شۆنەو گێرتەی ئی جۆر مارانە کە ئینە تەرسێ گەورێنە پەی جە بەین شیەی و قڕو ئی جانەوەرە سودمەندەیە.
جە گوزارشتو زانشتگاو سائوپائولو برزیلی ـ(Unesp)ئامەن کە جە کەڕەتی دمایینو ئی تاقیکاریە سەرو کارایی دۆزێ جیاوازێ مولکولو دلێ ئی ژەحریە وشکنای و تاوتوکاری فرەتەر مەکریۆ یانی ئایا ئی مولکولە مەتاوۆ وەرو ئا ویروسانە بگێرۆ کە خەریکێنێ لوای مەلان دەرونو سلولێ ئا ناوەشیە.
زانشتمەندێ ئومیدوارێنێ کە ئی مادە سەرو سلولێ ئینسانیچۆ تاقی بکریانێوە وەلێم هەڵای وەختەکەش دیاری نەکریان. مێژۆ بواچیو کە مارو "جاراراکاسو"( jararacussu) مارێوە فرە زلەن و دوێ میترێ درێژەن و نا جەنگەڵو ئاتلانتیکو برزیلی و هەرپاسە بولیوی و پاراگوئە و ئارژانتینیچەنە هەن.
پانویس:ژەحر و زەهر و سەم یەرێ واچێ و یەرێ چێوێ کاملەن جیاوازێنێ که جە سەرچەمەی ئینگلیسیەکەنە واچەو ژەحری ئامەن(سم فارسی). جە هۆرامیەنە هەرچێوێ لێقاییە ناوەشی ئاوەرش دلێنە بەربەی پەنەش مواچان"ژەحر"ش هەن حەتا ئەر ئینو ماریچ نەوۆ وەلێم سەم لزومەن ئینو ماری نیەن و هەرچێوێ یا خۆراکیوە ترازیا جە جڕو جانەوەریچ مەتاوۆ سەمش بۆ یانی سەمی بۆ بەڵام مار زەهرش هەن و زوانی هۆرامیەنە مواچان زەهروماری(ئا تەڕاییە کە جە ڕاو چزەو ماری مەچەقیۆ دلێ بەذەنو ئینسانی و پاسە کە هەر جە قەذیمەنە واتەنشان زەهرو ماری فرە شیرینەن!.