به گزارش هزارماسوله ،تلویزیونو میللی ئیتیوپی جە کەڕەتو دوەمو ئاوگیری سەدەو"النهضه"ی (گەورەتەرین سەدەو ئافریقای) هەواڵش دا. چی گوزارشتەنە ئامەن کە بەشێ جە ئاوەو ئی بەندئاوێ ڕوەو ڕۆخانەو"نیل"ی وەرە بیەنە.
بە واتەو دەوڵەتو"ئادیس ئابابا"ی،وەردای ئاوەو ئی سەدێ ئامادگی چەنی ئاژەی وەشت و وارو مانگانێ ئایەندەیەن بابەتێ کە بڕێ کارشناسێ ڕەدش مەکەرانێ و ماچان ئیتیوپی حەیوەتیەو سودان و میسری ئینەشە کەردەن.
نیگرانی و هەڕەشێ ئی چن ساڵە ویەردەی دوێ وەڵاتێ سودان و میسری هیچێش نەوەخشا و کار یاوان قایمایی. میسر چی بارەوە فرەتەر نیگەرانەن و"عبدالفتاح سیسی"ڕەییس جمهورو ئی وەڵاتەیە ماچۆ:بە هیچ کڵۆجێ ئیجازە نمەذیمێ ژیوای و زیندگی خەڵکو وەڵاتیش بگنۆ مەتەرسی و ئیتیوپی مشیۆ بزانۆ کە مەوجودیەتو میسری بینیان بە ڕۆخانەو"نیل"ی و ئەر بوازۆ سیناریو جەنگی نیزامیچ نا سەرو مێزیەنە.
سازنای و ئاوگیری بەندئاوو"النهضە"و ئیتیوپی بیەن بە گێچەڵێ گەورێ سیاسی،کۆمەڵگایی و بازرگانی میسر و سودانی و پاسە کە سەران و کاربەدەسێ دەوڵەتو میسری ماچان،ئاوگیری مەرحەڵەو کۆتایی ئی سەدێ نائارامیش ناشۆنیوە و قەیرانێ گەورێنە پەی کۆمەڵگاو دماڕۆ دوێ وەڵاتێو میسر و سودانی.
ئاوبەندو گەورەو"النهضه" جە جۆرو هیدروئێلێکتریکیەن و ئینا جە مەحاڵو "بنی شانگول گوموز" جە حدودو سودان و ئیتیوپیەنە و ڕۆخانەو گەورەو"نیل"ی چی یاگێنە پەنگیاینە. سازنای و هەرپاسە گردو کار و هەرمانەو وەش کەردەی ئی سەدێ کە جە ساڵەو ۲۰۱۱ ی عیسایی دەسش پەنە کەردەن،(هەڵای کارش مەنەن)سەرو چوار میلیارد دولارێ هەزینەش پەی کریان و ئەنجامو مەرزنای کۆتایی ئی سەدێ نزیکو ۶.۴۵ گیگاوات بەرق کیاستەو دلێ وەڵاتی و جە ئایەندەنە بەرو وەڵاتی مەکەرۆ و پیجۆرە بە گەورەتەرین سەدەو هیدروئیلێکتریکو گردوئافریقای و ۷مین سەدەو گەورێ جهانی مەژناسیۆ کە ئینا خەرمانێوە بە پانایی ۱۸۰۰کیلومیتری چوارگۆش. بەرزایی ئی سەدێ ۱۷۰ میترێن و مەتاوۆ پەشتیشەنە ۷۴ میلیاردمیتری موکەعەب ئاوی جەم بکەرۆ و نگابارۆ کە ئی ئەننازە وەراوەرەن چەنی بەشو یەکساڵ ئاوەو میسر و سودانی جە ئاوەو ڕۆخانەو"نیل"ی و ئیجا ۸۵۰۰ کاریگەر و موهەندێس و پەیمانکار و...بیس و چوارساعەتێ شەوانەڕۆی چی سەدێنە خەریکێ کارووباری بیەنێ.
بە پاو بەرئاوەردو کارشناسێ میسریێ،ئەر ئیتیوپی ماوە یەرێ ساڵێنە گردو گونجایشو قمەو ئی سەدێ پەره بکەرۆ،بەشو ئی وەڵاتیە(یانی میسر)جە ئاوەو ڕۆخانەو نیلی نزیکو۵۰% کەمە مەدۆ(نزیکو ۲۷ میلیارد میتری موکەعەب) و هەرپاسە ۶۷%(یانی۲۰۲۳۴میتری چوارگۆش) زەمینێ کشت و کاڵی ئی وەڵاتیە وەرو بێ ئاوێ وشکێ مەوان و ئینە یانی بیکاربیەی ۳۴% جە خەڵکو میسری و ئاشۆیە کە هەر جە ئیسەوە وێش وستەن بەرۆ و دماڕۆیە لێڵ و نادیارش کەوتەن شۆنی.
نظر شما
دیدگاه های ارسال شده توسط شما، پس از تایید توسط مدیریت در وب سایت منتشر خواهد شد