به گزارش هزارماسوله ،تۆکیو دەروازەو وەرهۆرزی؛کۆتا جەبارەو ئۆلەمپیکو ۲۰۲۰ی ژاپۆن وەڵاتێن چەوپەڕو وشکانی ئاسیای و ئینا دلێ پاناوو(اقیانوس)ئارامی.
چوار میان ئاوێ(جزیرە)"هۆنشو"، "هۆکایدۆ"،"شیکوکۆ"و "کیوشۆ"ی و نزیکو ۶۹۰۰ جزیرێ وردیتەرێ گردو خاکو سەرزەمینی ئی وەڵاتەیەنە بە جەمعیەتو ۱۲۷ میلیون کەسێ و پیجۆرە ژاپون ۱۱مین وەڵاتێن جە بابەتو جەمعیەتی جە جهانەنە.
یوەمین نیشانێو سۆکنا و ئەرەنیشتەی تەمەدونی ئی وەڵاتەیە مەگێلۆوە پەی ۳۰ هەزار ساڵێ چیوەڵی. زوانی نەتەوەیی وڕەسمی ژاپونی،ژاپونیەن و جە زوانێوە کۆنە و قەدیمی بەنامێ "کانبون"ی گیریان کە ئاییچ جە زوانی چینی سەرچەمە مەگێرۆ. یوەمین نویستەی پی زوانیە بە نامێ"کوجیکی"مەگێڵۆوە پەی سەرەتاو سەدەو هەشتی عیسایی کە بە خەتو زوانی چینی باستانیەن و ۱۶۰۳ ێ تا ۱۸۶۸ی عیساییچ،دەوران و سەردەمو شکوفایی و ترۆق و وەڵکەوتەی ئی زوانیە بێ. ژاپون جە ساڵەو ۱۹۱۲ی عیسایی لوا دلێو بازی ئۆلەمپیکی و دماتەرۆ جە گردو ئۆلەمپیکی جهانی بەشداربیەن بێجگە ساڵەو ۱۹۴۸ی و هەرپاسە ساڵەو ۱۹۸۰ی کە چەنی ئامریکای نەلوای پەی بازییو ئۆلەمپیکو موسکۆی. شارو تۆکیوی چەنی مادرید و ئێستانبول یەرێ نامزەدێ گێرتەی مێزبانی ئۆلەمپیکی بێنێ کە سەرئەنجام جە ڕەی گیری کۆتایەنە ۶۰ بە ۳۶ جە وەراوەرو ئیستانبولو ترکیەی سەرکەوت و بی بە مێزبانو ئی دەورە جە ئۆلەمپیکی.
تۆکیو وەڵتەریچ یانی ساڵەو ۱۹۶۴ی عیسایی بیەبێ بە مێزبانو ئۆلەمپیکی. شارو تۆکیو نزیکو ۳۷ میلیونێ جەمعیەتش هەن و نزیکو یەک چوارمو جەمعیەتو ژاپونی ئەرەنیشتێ ئی شاریەنێ و پیجۆرە جە بابەتو نفوسێ گەورەتەرین پایتەختو جهانیەن. تۆکیو دماو دەسەڵاتو ئیمپراتوری ۱۸۶۸ی بی بە پایتەختو ژاپونی. پەی نیشان دای گەورە بیەی ئی شاریە مشیۆ پینەی ئیشارە بکریۆ کە ئیسەتێ جە ڕۆنە فەقەت ۳/۶میلیون کەسێ جە قەتارو شارو تۆکیوی جابجای مەوان کە شلۆغتەرین ئیستگاو قەتاریەن جە گردو جهانیەنە و جە کتێبو گینێسیەنە پسەو ڕکۆردی جهانی سەبت بیەن.
جە ئۆلەمپیکو ۲۰۲۰و تۆکیوی ۳۳ێ گەمێ و ڕشتێ وەرزشیێ (بە۵۰ چێرشاخە) مەلان ڕاوە و وەرزشکارێو چنها وەڵاتێ چەنی یەکترینی مەگنان ڕقابت و زۆرەزمێ. بابەتێ وەش و جالب جە بارەو ئۆلەمپیکو تۆکیوی جنسو مدالو ئی بازیانەنە کە جە چێوانێ فلزێ کارکریای و کۆنێ ئێلێکترونیکی (بازیافتی)سازکریاینێ و ئیده و متەی ئی بەرنامەیە ئینو یۆیە بەنامێ"کاوانیشی جونیچی" بێ کە جە میانو ۴۰۰ کەسێ هۆرچنیا و ڕاوبەرێ ئۆلەمپیکی ئی ئیدەشانە گل داوە و پی بونەو داواکریا جە خەڵکو ژاپونی تا پەی وەشکەردەی مدالێ وەرزشکاران کەل و پەل و چێوانێ ئێلێکترونیکی کارکریای و بەرقی وێشان بەخشان پا یاگانە تایین کریاینێ کە دماتەرۆ نزیکو ۱۵۰ تۆنێ چی چێوە ئێلێکترونیکیانە جە لاو مەردمو ئی وەڵاتیە بەخشیا و دریا پەی سازنای مدالێو ئۆلەمپیکی(مەردمو ژاپونێ تەنیا نزیکو۶میلیون گۆشیێ تلێفونێ هامڕایشان دای پەی سازنای مدالێو ئی ئۆلەمپیکیە).
میراتووا(Miraitowa)وەیوڵێ و نمادو ئۆلەمپیکو تۆکیویەن و ئی وەیوڵێچە هەرپسەو جنسو مدالەکان جە لاو مسیارێ مەدرەسێو ژاپونی پەسەندکریا یانی ۱۶۷۰۰ مسیارێ ئی وەیوڵێشانە هۆرچنیە کە جە ئایینو سونەتی و سەبکو مودڕنو ژاپونی گیریان و چەنی لوگۆ ئی بازیانە،فەرهەنگو ئی وەڵاتیە نیشانە مەذان. میراتووا(Miraitowa)جە دوێ واچێ ئایەندە و هەمیشەیی(هەتاهەتایی) گیریان و پی مانا و مەفهومەنە کە:ئارزومان ئینەنە که [گەمێو]ئۆلەمپیکو ۲۰۲۰ی بتاوۆ ئومید بە دماڕۆیە هەمیشەیی بوزۆ دڵو گردکەسێ جە سەرتاسەرو جهانیەنە" ۳۲مین بارو بازیێ ئۆلەمپیکو تۆکیوی جە یوەم ڕۆ ئی برجیە(گەلاوێژو ۱۴۰۰ی ڕۆجیاری)بە بەشداری ۱۱هەزار وەرزشکارێ و شۆنیەرە پارائۆلەمپیک بە حزورو ۴۴۰۰ وەرزشکارێ مەلۆڕاوە. ۶۶ وەرزشکارێ ئێرانێ ئینای کاروانو ئی دەورە جە ئۆلەمپیکو تۆکیوی. مێژۆ بواچیۆ کە مێزبانو ئۆلەمپیکو ۲۰۲۴یچ شارو پاریسو فەڕانسەیەن و دماو ئاییچ یانی ۲۰۲۸ عیسایی شارو لۆس ئانجلسو ئامریکای مێماندارو وەرزشکارێو سەراسەرو جهانیەن.
نظر شما
دیدگاه های ارسال شده توسط شما، پس از تایید توسط مدیریت در وب سایت منتشر خواهد شد